Արարատի ստորոտին հայտնաբերվել են «թունելներ»․ The Daily Mail

Ամերիկացի հետազոտողների թիմը, որն աշխատում է Արարատ լեռան մոտակայքում գտնվող Դուրուփընար կազմավորման վայրում, հայտնաբերել է թաքնված թունելների ապացույցներ, ինչպես նկարագրված է աստվածաշնչյան պատմության մեջ: Այս մասին հաղորդում է The Daily Mail-ը։

 Noah's Ark Scans նախագծի անկախ հետազոտող Էնդրյու Ջոնսը, օգտագործելով գետնի տակ թափանցող ռադարներ (GPR), հայտնաբերել է «միջանցքների» ցանց, որոնք տանում են դեպի կենտրոնական դատարկ խցիկ: Ջոնսն այս հատվածն անվանել է «ատրիում»:

Ըստ հետազոտողի՝ այս կառուցվածքը համապատասխանում է Աստվածաշնչի նկարագրությանը, որտեղ նշվում է, որ տապանն ուներ երեք մակարդակ՝ նախատեսված Նոյի ընտանիքի և կենդանիների համար:

«Այս դատարկությունները դասավորված են որոշակի օրինաչափությամբ, դրանք պատահական բնական երևույթներ չեն», - նշել է Ջոնսը:

Ինֆրակարմիր տեխնոլոգիաներ և նավի կմախքը

Բացի ռադարային հետազոտությունից, թիմը կիրառել է նաև ինֆրակարմիր թերմոգրաֆիա (IRT): Այս տեխնոլոգիան թույլ է տվել հողի տակ տեսնել նավի իրան հիշեցնող կառուցվածք:

Հետաքրքրական է, որ Դուրուփինար կոչվող այս վայրը գտնվում է Արարատ լեռից ընդամենը 30 կմ հարավ: Այն հայտնի է դարձել 1948 թվականին, երբ ուժեղ անձրևներից ու երկրաշարժից հետո հողի շերտը մաքրվել էր՝ ի հայտ բերելով նավի ձև ունեցող կազմավորումը:

Գիտական բանավեճ և ապագա պլաններ

Թեև շատ երկրաբաններ պնդում են, որ Դուրուփինարը զուտ բնական երևույթ է, հետազոտողները մատնանշում են մի շարք անոմալիաներ.

• Չափսերը: Կազմավորման երկարությունը (շուրջ 157 մետր) զարմանալիորեն համապատասխանում է աստվածաշնչյան «300 կանգուն» չափմանը:

• Բուսականությունը: Տապանի ներսում աճող խոտն ունի այլ գույն և բաղադրություն, քան հարակից տարածքներում, ինչը կարող է վկայել մարդածին նյութերի առկայության մասին:

Հետազոտական թիմի հաջորդ քայլը լինելու է հորատումը: Նրանք մտադիր են նմուշներ վերցնել կառույցի խորքից և հատուկ տեսախցիկներ իջեցնել հայտնաբերված թունելների մեջ՝ վերջնական պատասխան ստանալու համար: