Նա խեղաթյուրում է սեփական ժողովրդի ողբերգական պատմությունը․ Զախարովա

ՌԴ ԱԳՆ խոսնակ Մարիա Զախարովան անթույլատրելի է համարել Իսրայելի վարչապետ Բենիամին Նեթանյահուի պնդումը՝ Իրանից բխող «միջուկային հոլոքոստի» վտանգը վերացնելու վերաբերյալ։

Ռուսաստանի արտաքին գործերի նախարարության պաշտոնական ներկայացուցիչը նշել է, որ նմանատիպ ձևակերպումները վնասում են հենց նրանց, ում փորձում են պաշտպանել։ Դիվանագետն ընդգծել է, որ հնարավոր չէ պաշտպանություն ապահովել սեփական ժողովրդի ողբերգական պատմության խեղաթյուրման միջոցով։ Ըստ նրա՝ անհրաժեշտ է իմանալ ճշմարտությունը, որքան էլ այն դժվար կամ ցավոտ լինի, և չպետք է այն  աղավաղել՝ ելնելով քաղաքական նպատակներից։

Նախորդ օրը Մարիա Զախարովան Իսրայելի կառավարության ղեկավարին մեղադրել էր հասկացությունները սխալ մատուցելու մեջ։ Խոսնակի գնահատմամբ՝ տվյալ համատեքստում Օսվենցիմի, Մայդանեկի և Սոբիբորի հիշատակումը վկայում է Երկրորդ համաշխարհային պատերազմի բոլոր զոհերի հիշատակի նկատմամբ անհարգալից վերաբերմունքի մասին։