Ջեյ Դի Վենսի այցը Պակիստան չեղարկվել է․ Սպիտակ տուն

Սպիտակ տունը պաշտոնապես հաստատել է ԱՄՆ փոխնախագահ Ջեյ Դի Վենսի՝ Պակիստան նախատեսված այցի չեղարկումը։ Ակնկալվում էր, որ նա պետք է գլխավորեր ամերիկյան պատվիրակությունը Իրանի ներկայացուցիչների հետ կայանալիք բանակցություններում։

Այցի չեղարկման հիմնական պատճառը նախագահ Դոնալդ Թրամփի վերջին հայտարարությունն է «Truth Social» սոցիալական ցանցում։ Ըստ ամերիկյան կողմի՝ Վաշինգտոնն այժմ սպասում է Թեհրանի կողմից ներկայացվելիք միասնական առաջարկին, ինչն էլ փոխել է դիվանագիտական օրակարգը։ Սպիտակ տունը հայտնել է, որ հետագա հանդիպումների կամ հնարավոր առերես քննարկումների մասին լրացուցիչ տեղեկատվություն կտրամադրվի ավելի ուշ։

Զուգահեռաբար հայտնի է դարձել, որ նախագահ Թրամփը մտադիր է երկարաձգել Իրանի հետ հրադադարի ռեժիմը։ Համաձայնության ժամկետը պետք է լրանար առաջիկա ժամերի ընթացքում, սակայն նախագահի որոշումը հնարավորություն է տալիս շարունակել դիվանագիտական գործընթացը՝ սպասվող նոր առաջարկների համատեքստում։