Բրիտանիան ամենամասշտաբային մատակարարումը կիրականացնի․ 120 հազար ԱԹՍ-ը՝ Ուկրաինային

Բրիտանիայի կառավարությունը հայտնել է Ուկրաինային տրամադրվող ռազմական օգնության ընդարձակ ծրագրի մեկնարկի մասին, որի շրջանակում 2026 թվականին նախատեսվում է հատկացնել 120 հազար անօդաչու թռչող սարքեր, գրում է «ՏԱՍՍ»-ը։

Սա Լոնդոնի կողմից իրականացվող ամենամասշտաբային մատակարարումն է։ Պաշտոնական տվյալներով՝ սպառազինության առաջին խմբաքանակների փոխանցումն ուկրաինական կողմին սկսվել է ապրիլից։

Տրամադրվող տեխնիկական միջոցները ներառում են սարքերի լայն շրջանակ՝ հեռահար հարվածային դրոններից մինչև դիտարկման ու հետախուզական համակարգեր։ Օգնության փաթեթում ընդգրկված են նաև ծովային միջոցներ և լոգիստիկ նշանակության անօդաչուներ։ Բրիտանական կողմի փոխանցմամբ՝ բոլոր այս տեխնոլոգիաները փորձարկվել են և կիրառվել մարտական իրավիճակներում։

Նախագծի ֆինանսավորումն ապահովվում է ընթացիկ տարվա համար Ուկրաինային հատկացված 3 միլիարդ ֆունտ ստերլինգ (շուրջ 4 միլիարդ դոլար) ընդհանուր բյուջեից։ Արտադրության մեջ ներգրավված են Միացյալ Թագավորության առաջատար ընկերությունները, այդ թվում՝ Malloy Aeronautics-ը, Windracers-ը և Tekever-ը։ Լոնդոնը նաև ընդգծում է, որ այս պատվերների արդյունքում երկրում նոր աշխատատեղեր կստեղծվեն։