Ադրբեջանում գերեզմանը ջրի տակ է անցել

Ադրբեջանի Ապշերոնի շրջանի գերեզմանատներից մեկը հեղեղվել է: Բնակիչների խոսքով՝ գերեզմանները շուրջ 15 օր գտնվում են ջրի մեջ։ Տեղացիները նշում են, որ խնդիրը դեռ չի լուծվել։

Շրջանի գործադիր իշխանությունը պարզաբանել է, որ գերեզմանատան ցածրադիր մասում կուտակվել են անձրևաջրերն ու գրունտային ջրերը, ինչի հետևանքով էլ տեղի է ունեցել ջրածածկում։

Պաշտոնական տվյալներով՝ առաջին օրերից իրականացվում են ջրի հեռացման աշխատանքներ՝ ինչպես գերեզմանատան տարածքում, այնպես էլ ավանի ընդհանուր օգտագործման ճանապարհներին։ Ներգրավվել են լրացուցիչ պոմպեր, ինչպես նաև փորվել են ջրահեռացման առուներ՝ ջրի արտահոսքը արագացնելու նպատակով։

Շարունակվում են նաև այն հատվածների մաքրման աշխատանքները, որտեղ ջուրը կուտակվել է գերեզմանների շրջակայքում։ Նշվում է, որ աշխատանքները դեռ ընթացքի մեջ են։