Թրամփը Իրանի հետ բանակցությունների մասով հայտարարություն է արել

ԱՄՆ նախագահ Դոնալդ Թրամփը հայտարարել է, որ Վաշինգտոնը «լուրջ բանակցություններ» է վարում Իրանում ձևավորված նոր իշխանության հետ, և այդ գործընթացը, նրա խոսքով, կարող է հանգեցնել Իրանում ամերիկյան ռազմական գործողությունների ավարտին։ Truth Social-ում հրապարակած գրառմամբ Թրամփը նշել է.

«Ամերիկայի Միացյալ Նահանգները լուրջ քննարկումներ է վարում նոր, և ավելի խելամիտ կառավարության հետ՝ Իրանում մեր ռազմական գործողություններին վերջ դնելու նպատակով»։

Նա նաև ընդգծել է, որ արձանագրվել է զգալի առաջընթաց, սակայն զգուշացրել է, որ եթե մոտ ժամանակում համաձայնություն չլինի, և եթե Հորմուզի նեղուցը բաց չլինի, ապա ԱՄՆ-ը  հարվածներ կհասցնի Իրանի էլեկտրաէներգիայի արտադրության օբյեկտներին, նավթահորերին և Խարգ կղզուն։

Թրամփը նշել է նաև, որ թիրախ կարող են դառնալ նույնիսկ աղազերծման գործարանները, որոնք, նրա խոսքով, մինչ այժմ «դիտավորյալ չեն թիրախավորվել»։

Նրա խոսքով՝ այդ քայլերը կլինեն պատասխան Իրանի նախկին իշխանության «47-ամյա ահաբեկչական կառավարման» ընթացքում ամերիկացի զինծառայողների և այլ անձանց սպանությունների համար։