Ռուսաստանը պատրաստ է բանակցությունների՝ իր պայմաններով. Մեդվեդև

Ռուսաստանը բազմիցս հայտարարել է, որ պատրաստ է Ուկրաինայի հետ խաղաղ բանակցությունների, սակայն դրանք պետք է անցկացվեն Մոսկվայի ձևակերպած պայմաններով, РИА Новости-ի հարցին պատասխանելիս ասել է ՌԴ Անվտանգության խորհրդի նախագահի տեղակալ Դմիտրի Մեդվեդևը։

«Բազմիցս ասվել է, որ մենք պատրաստ ենք խաղաղ բանակցությունների, սակայն դրանք պետք է ընթանան այն պայմաններով, որոնք ձևակերպվել են Ռուսաստանի Դաշնության կողմից»,- ասել է Մեդվեդևը։

ՌԴ նախագահի մամուլի քարտուղար Դմիտրի Պեսկովը մարտի 15-ին հայտնել էր, որ Ուկրաինայի շուրջ բանակցություններում դադար է սկսվել, իսկ ԱՄՆ-ն կենտրոնացած է այլ ուղղության վրա։ Ավելի ուշ նա նշել էր, որ Ռուսաստանը սպասում է բանակցությունների նոր փուլին, սակայն հասկանալի պատճառներով դրա վայրն ու ժամանակը դեռևս որոշված չեն։

Տարվա սկզբից Ռուսաստանի և Ուկրաինայի պատվիրակությունները ԱՄՆ-ի մասնակցությամբ անցկացրել են բանակցությունների երեք փուլ։ Վերջինը կայացել է Ժնևում՝ փետրվարի 17-18-ին։