Կայա Կալլասը դատապարտել է Իրանի հարձակումները

Եվրամիությունը դատապարտել է Իրանի կողմից Կատարի նավթագազային ենթակառուցվածքների դեմ իրականացված հարձակումները և հայտարարել, որ իրավիճակը պահանջում է անհապաղ դեէսկալացիա։ Այդ մասին ԵՄ դիվանագիտության ղեկավար Կայա Կալլասն ասել է Եվրամիության գագաթնաժողովի մեկնարկից առաջ։

Նրա խոսքով՝ Կատարի էներգետիկ օբյեկտների թիրախավորումը միայն խորացնում է անկայունությունը և նպաստում տարածաշրջանում քաոսի շարունակությանը։ Կալլասը նշել է, որ ստեղծված իրավիճակից դուրս գալու համար անհրաժեշտ է ոչ թե լարվածության նոր աճ, այլ հակամարտության թուլացում։

ԵՄ արտաքին քաղաքականության պատասխանատուն նաև հայտնել է, որ շարունակում է դիվանագիտական շփումները թե՛ Իրանի, թե՛ Միացյալ Նահանգների հետ։ Նա ընդգծել է, որ առաջիկայում ևս շարունակելու է բարձրացնել դեէսկալացիայի հարցը։