Արփինե Սարգսյանը մանրամասներ է հայտնել Աջափնյակի կրակոցների դեպքից

Աջափնյակում տեղի ունեցած կրակոցների դեպքի մասով արդեն շուրջ 20 անձ կա մեղադրյալի կարգավիճակով։ Այս մասին NEWS.am–ի հետ զրույցում հայտնել է ՆԳ նախարար Արփինե Սարգսյանը։

«Եվս 10 անձի իդենտիֆիկացրել ենք և արդեն քննչական կոմիտեի գործընկերների հետ աշխատում ենք, օժանդակում ենք, որպեսզի այս անձանց մասով իրավական պրոցեսը ևս հարթ լինի։ Լայնածավալ օպերատիվ աշխատանքներ ենք նաև տանում հիմնական կատարողներին հայտնաբերելու ուղղությամբ։ Վստահ եմ՝ գիտեք, որ այդ անձինք արդեն իսկ որպես մեղադրյալ ներգրավվել են վարույթով, կա հայտարարված հետախուզում։ Մենք ակտիվ օպերատիվ հետախուզական միջոցառումներ ենք իրականացնում, որպեսզի գտնենք բոլորին և նրանց արարքներին տանք իրավական գնահատում։ Այս պահի դրությամբ թույլ տվեք ավել մանրամասներ չնշել՝ հաշվի առնելով օպերատիվ աշխատանքը»,–ասել է նա։

Հիշեցնենք, որ փետրվարի 18–ին, Աջափնյակի բնակելի թաղամասում օրը ցերեկով մի խումբ քաղաքացիներ հաշիվներ էին պարզել, ինչի ժամանակ ինքնաձիգից արձակված կրակոցներից մեկ մարդ զոհվել էր, վեցը՝ վիրավորվել։

Քրեական հետապնդում է հարուցված 17 անձի նկատմամբ։