Էփշտեյնի գործի ֆայլերը հայտնվել են հաքերի հասանելիության տակ․ Reuters

2023 թվականին օտարերկրյա հաքերը հասանելիություն է ստացել ԱՄՆ Դաշնային հետաքննությունների բյուրոյի (ՖԲՌ) ֆայլերին, որոնք կապված էին ֆինանսիստ Ջեֆրի Էփշտեյնի վերաբերյալ իրականացվող քննության հետ։ Այդ մասին հայտնում է Reuters գործակալությունը՝ հղում անելով աղբյուրին և ԱՄՆ արդարադատության նախարարության փաստաթղթերին։

Գործակալության տվյալներով՝ միջադեպը տեղի է ունեցել 2023 թվականի փետրվարի 12-ին Նյու Յորքում՝ երեխաների դեմ հանցագործությունների քննությամբ զբաղվող թվային փորձաքննության լաբորատորիայում։ ՖԲՌ-ի աշխատակիցը թվային ապացույցների հետ աշխատանքից հետո սխալմամբ բաց է թողել սերվերի արտաքին հասանելիությունը, ինչի հետևանքով համակարգում խոցելիություն է առաջացել։

Հաջորդ օրը աշխատակիցները հայտնաբերել են հաղորդագրություն ցանցի հնարավոր խախտման մասին։ Ստուգման ընթացքում արձանագրվել են չարտոնված մուտքի հետքեր և Էփշտեյնի գործին առնչվող որոշ ֆայլերի դիտում։ Առայժմ պարզ չէ, թե կոնկրետ որ նյութերն են բացվել և արդյոք դրանք ներբեռնվել են։

ՖԲՌ-ում միջադեպը որակել են որպես «մեկուսացված կիբերհարձակման դեպք»՝ նշելով, որ հաքերի հասանելիությունը արագ արգելափակվել է և համակարգի աշխատանքը վերականգնվել է։ Աղբյուրի փոխանցմամբ՝ հաքերը սկզբում չի գիտակցել, որ մուտք է գործել իրավապահ մարմինների սերվեր, և սարքում հայտնաբերած երեխաների նկատմամբ բռնության հետ կապված պատկերների պատճառով նույնիսկ սպառնացել է տեղեկացնել այդ մասին հենց ՖԲՌ-ին։