Ռուսական նավթի և գազի արգելքը կկործանի ԵՄ տնտեսությունը․ Սիյարտո

Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն հայտարարել է, որ Ռուսաստանի նկատմամբ սահմանված էներգետիկ սահմանափակումների պահպանումը կարող է լուրջ ազդեցություն ունենալ Եվրոպայի տնտեսության վրա։ Նրա խոսքով՝ ռուսական նավթի և գազի ներմուծման արգելքը պահպանելու դեպքում էներգակիրների գների աճը կշարունակի խորացնել տնտեսական ճնշումը եվրոպական երկրների վրա։

Սիյարտոն այս մասին խոսել է Facebook սոցիալական ցանցում հրապարակված տեսաուղերձում՝ նշելով, որ Բրյուսելի կողմից սահմանված սահմանափակումները, եթե չվերանայվեն, կարող են զգալի հարված հասցնել եվրոպական տնտեսությանը։ Նախարարի գնահատմամբ՝ էներգակիրների թանկացումը անմիջապես ազդում է նաև մյուս ապրանքների և ծառայությունների արժեքի վրա։

Նրա խոսքով՝ էներգիայի գների աճը շղթայական ազդեցություն ունի տնտեսության տարբեր ոլորտների վրա, քանի որ արտադրության և ծառայությունների մեծ մասը կախված է էներգետիկ ծախսերից։ Այդ պատճառով գների բարձրացումը տարածվում է գրեթե բոլոր ոլորտներում։

Սիյարտոն նաև նշել է, որ եթե Եվրոպան չվերանայի իր քաղաքականությունը ռուսական էներգակիրների ներմուծման հարցում, ապա գների աճը կարող է հասնել այնպիսի մակարդակի, որը լուրջ տնտեսական դժվարություններ կստեղծի եվրոպական երկրների բնակիչների համար։