ԱԺ առողջապահության հարցերի հանձնաժողովի նախագահ ընտրվեց Վանիկ Օհանյանը

Ազգային ժողովի առողջապահության հարցերի մշտական հանձնաժողովի նախագահի պաշտոնում ընտրվեց «Քաղաքացիական պայմանագիր» խմբակցության պատգամավոր Վանիկ Օհանյանը։ Նրա թեկնածությունն առաջադրել էր իշխող խմբակցությունը։  ԱԺ 107 պատգամավորից քվեարկությանը մասնակցել է 64-ը։

Քվեարկության արդյունքներով Վանիկ Օհանյանի թեկնածությանը կողմ է քվեարկել 64 պատգամավոր, դեմ՝ 0։

«Որոշումն ընդունվել է, հաջողություն ենք մաղթում ձեզ, պարո՛ն Օհանյան, այս կարևոր պաշտոնում»,- Օհանյանին դիմելով՝ ասաց ՀՀ ԱԺ նախագահի տեղակալ Հակոբ Արշակյանը։

Նշենք, որ Ազգային ժողովի առողջապահության հարցերի հանձնաժողովի նախորդ նախագահը Հռիփսիմե Հունանյանն էր։ Տարեսկզբին նա հրաժարականի դիմում էր ներկայացրել ԱԺ առողջապահության հարցերի մշտական հանձնաժողովի նախագահի պաշտոնից, ինչպես նաև ինքնաբացարկ էր հայտնել՝ տեղեկացնելով, որ առաջիկա խորհրդարանական ընտրություններին չի ընդգրկվելու «Քաղաքացիական պայմանագիր» կուսակցության համամասնական ցուցակում։