Իրանի ԶՈՒ-ն հայտարարություն է արել․ Հորմուզի նեղուցը փակելու խոստումն արված է

Պարսից ծոցի մուտքի և ելքի հատվածներում տասնյակ տանկերներ ու բեռնատար նավեր են կուտակվել Օրմուզի նեղուցի փակվելուց հետո։ Այս մասին վկայում են Vesselfinder նավերի հետևման ծառայության տվյալները։

Ծառայության տեղեկություններով՝ հենց նեղուցի ջրատարածքը գրեթե դատարկ է մնացել։ Գիշերը Իրանի Իսլամական հեղափոխության պահապանների կորպուսի ռազմածովային ուժերը հայտարարել են, որ իրանական զինվորականները լիովին վերահսկում են Օրմուզի նեղուցը։ Նրանց հաղորդմամբ՝ նավթի, առևտրային և ձկնորսական նավերի տեղաշարժը այդ տարածքով այժմ անհնար է։ Կորպուսը նաև պնդել է, որ նեղուցի շրջանում ոչնչացվել են ավելի քան տասը տանկերներ։

 «Ներկայումս Հորմուզի նեղուցը Իսլամական Հանրապետության նավատորմի լիակատար վերահսկողության տակ է»,-  ասել է Հորմուզի նեղուցի ռազմածովային ուժերի պաշտոնյա Մոհամմադ Ակբարզադեն։

Միաժամանակ ԱՄՆ նախագահ Դոնալդ Թրամփը հայտարարել է, որ անհրաժեշտության դեպքում ամերիկյան ռազմածովային ուժերը կսկսեն ուղեկցել տանկերներին Օրմուզի նեղուցով անցնելիս։ Նա նաև հանձնարարել է ապահովել Պարսից ծոցում իրականացվող ծովային առևտրի ապահովագրությունը մատչելի պայմաններով։