Իրանում ծավալվող իրադարձություններից Հայաստանը դաս պետք է քաղի․ Նարեկ Կարապետյան

«Ուժեղ Հայաստան» կուսակցության խորհրդի անդամ Նարեկ Կարապետյանը կարծում է, որ Իրանում  ծավալվող իրադարձություններից Հայաստանը դաս պետք է քաղի։ Կարծիքը Կարապետյանը հայտնել է «Արմենիա» հեռուստաընկերությանը տված հարցազրույցում։

«Իրանի դեպքերից դասն այն է, որ մեզ, խաղաղության հասնելու համար, պետք են երաշխավորներ։ Իրանը բազմաթիվ գործարքներ է ունեցել Արևմուտքի հետ, սակայն, չունենալով երաշխավոր, այսօր մենակ առերեսվում է տարածաշրջանային այլ երկրների և համաշխարհային գերտերությունների կողմից պրոցեսների։ Մենք պետք է դաս քաղենք, որ խաղաղության կարելի է հասնել ոչ միայն պայմանավորվածություններով, այլև հարկավոր են մեկից ավելի երաշխավորներ»,- ասել է նա։

Պատերազմի հետևանքով, ըստ Նարեկ Կարապետյանի, Իրանի արդյունաբերական պոտենցիալը նվազելու է, սակայն Իրանն ու Հայաստանը շարունակելու են համագործակցել։

«Իրանը դառնալու է ավելի շատ հումք արտահանող երկիր, կարող է հումք մատակարարել Հայաստան՝ նավթամթերք, մետալուրգիական արտադրանքի սկզբնական շղթայի հումք և այլն, սա ՀՀ տնտեսության համար փոխլրացնող ու հետաքրքիր ուղղություն է, այսինքն՝ Իրանը տնտեսապես շարունակելու է մեզ համար լինել հետաքրքիր հարևան, մենք փոխադարձ հետաքրքրությունների դաշտում ենք մնալու»,- կարծիք է հայտնել Նարեկ Կարապետյանը։