Ռուբիոն՝ Իրանի շուրջ ԱՄՆ որոշումների մասին․ Իսրայելի ծրագրերից տեղեկացված էինք

ԱՄՆ պետքարտուղար Մարկո Ռուբիոն հայտարարել է, որ Վաշինգտոնը Իրանի դեմ հնարավոր գործողությունների ժամկետները որոշելիս հաշվի է առել Իսրայելի պլանավորած հարվածը և դրա հետևանքները։ Նրա խոսքով՝ ամերիկյան կողմը տեղեկացված է եղել Իսրայելի մտադրությունների մասին և պատրաստվել է զարգացումների տարբեր սցենարների։

Ռուբիոն լրագրողների հետ զրույցում նշել է, որ ԱՄՆ-ը գիտակցել է՝ ինչ ազդեցություն կարող են ունենալ Իսրայելի քայլերը տարածաշրջանային իրավիճակի վրա, և անհրաժեշտ է եղել նախապես պատրաստ լինել հնարավոր արձագանքներին։

Պետքարտուղարի պնդմամբ՝ Իրանի պատասխան գործողությունների հետևանքով թիրախավորվում են նաև ամերիկյան դիվանագիտական ներկայացուցչությունները։ Նա հայտարարել է, որ նման հարձակումներ իրականացվում են ԱՄՆ և Իսրայելի հարվածներին ի պատասխան։

Հիշեցնենք՝ փետրվարի 28-ին ԱՄՆ-ը և Իսրայելը սկսել են հարվածներ հասցնել Իրանի տարածքում գտնվող մի շարք օբյեկտների, այդ թվում՝ Թեհրանում։ ԶԼՄ-ներում հաղորդվում է ավերածությունների և խաղաղ բնակիչների զոհերի մասին։ Իրանը, իր հերթին, հարվածներ է հասցնում Իսրայելի տարածքին և ԱՄՆ ռազմական օբյեկտներին։