Սթիվեն Հոքինգը՝ Էփշտեյնի հովանավորած միջոցառմանը

Սթիվեն Հոքինգի ընտանիքի ներկայացուցիչը հայտնել է, որ ԱՄՆ արդարադատության նախարարության հրապարակած փաստաթղթերում ընդգրկված լուսանկարում գիտնականի կողքին երևացող բիկինիով երկու կանայք եղել են նրա խնամակալները։ Այս մասին գրում է Sun պարբերականը։

Նշվում է, որ լուսանկարն արվել է 2006 թվականին Կարիբյան Սենթ Թոմաս կղզու Ritz Carlton հյուրանոցում՝ քվանտային կոսմոլոգիային նվիրված միջոցառումից հետո, որտեղ Հոքինգը ելույթ է ունեցել։ Աղբյուրի փոխանցմամբ՝ միջոցառմանը մասնակցել է նաև Ջեֆրի Էփշտեյնը, որը ֆինանսավորել է 21 գիտնականների ներկայությունը, այդ թվում՝ Հոքինգի այցը։

Ընտանիքի ներկայացուցչի խոսքով՝ գիտնականը խնամակալների օգնության կարիք է ունեցել՝ նրա մոտ ախտորոշված կողմնային ամիոտրոֆիկ սկլերոզի պատճառով։ Նա հավելել է, որ Էփշտեյնի հետ կապի հիմքով Հոքինգի հասցեին հնչող մեղադրանքները անհիմն են։

Ավելի վաղ ՌԻԱ Նովոստին հայտնել էր, որ Էփշտեյնը նամակագրության ընթացքում պնդել է, թե իր մասնավոր կղզի կատարած այցի ժամանակ Սթիվեն Հոքինգի գլուխը ամրացվել է սայլակին, որպեսզի նա կարողանա սուզանավով իջնել ջրի տակ։ 2019 թվականին Էփշտեյնին ԱՄՆ-ում մեղադրանք է առաջադրվել անչափահասների սեքսուալ շահագործման նպատակով առևտրի համար, իսկ նույն տարվա հուլիսին նա մահացել է կալանավայրում․ քննությունը եզրակացրել է ինքնասպանություն։