ԱՄՆ-ում չեն բացառում Իրանի գերագույն առաջնորդի դեմ հարձակումը․ The New York Times

ԱՄՆ-ն դիտարկում է Իրանին հարված հասցնելու տարբերակը՝ Թեհրանին միջուկային ծրագրի շուրջ բանակցություններում զիջումների մղելու նպատակով։ Այս մասին գրում է The New York Times-ը՝ հղում անելով ամերիկացի պաշտոնյաներին։

Պարբերականի փոխանցմամբ՝ Վաշինգտոնում կասկածներ ունեն, թե Իրանը պատրաստ է համաձայնության գալ, սակայն քննարկվող «կետային հարվածների» ռազմավարությունը միտված է Իրանի ղեկավարությանը բանակցային գործընթացում ավելի ճկուն դիրքորոշման դրդելուն։ Նշվում է, որ հնարավոր գործողությունների հիմնական թիրախը կարող են լինել Իրանի միջուկային օբյեկտները։

Միաժամանակ, ամերիկացի պաշտոնյաները նշում են, որ նման քայլը կունենա նաև խորհրդանշական նշանակություն։ Ըստ աղբյուրների՝ դա կարող է հնարավորություն տալ ԱՄՆ նախագահ Դոնալդ Թրամփին հայտարարել արտաքին քաղաքական հաջողության մասին։ Սակայն գործող և նախկին որոշ պաշտոնյաներ կասկած են հայտնում, թե նման սցենարը կհանգեցնի Իրանի կողմից ուրանի հարստացման ծրագրից հրաժարվելուն։

ԱՄՆ-ում չեն բացառում նաև Իրանի գերագույն առաջնորդ Այաթոլլա Ալի Խամենեիի դեմ հարվածի հնարավորությունը։