Արևմուտքը Հայաստանն օգտագործում է որպես աշխարհաքաղաքական գործիք Մոսկվայի հետ առճակատման մեջ․ Գալուզին

Ռուսաստանի փոխարտգործնախարար Միխայիլ Գալուզինը հայտարարել է, որ Արևմուտքը Հայաստանն օգտագործում է որպես աշխարհաքաղաքական գործիք Մոսկվայի հետ առճակատման մեջ։

«Վերջերս ՀՀ վարչապետ Նիկոլ Փաշինյանը հարցազրույցում նշել է, որ Հայաստանի դիրքորոշումը չի ենթադրում Ռուսաստանի շահերին վնաս հասցնել։ Սակայն մենք տեսնում ենք, որ Երևանը արագացնում է իր ռազմաքաղաքական և տնտեսական մերձեցումը Արևմտյան երկրների և միավորումների հետ։ Մենք բազմիցս ասել ենք մեր հայ գործընկերներին, որ Արևմուտքի համար, և նրանք այլևս չեն թաքցնում դա, Հայաստանը աշխարհաքաղաքական գործիք է Մոսկվայի հետ առճակատման մեջ», - ասել է նա։

Գալուզինի խոսքով՝ Երևանը տեղյակ է Մոսկվայի հիմնարար գնահատականներին՝ ԵՄ անդամակցության և Եվրասիական տնտեսական միության անդամակցության անհամատեղելիության վերաբերյալ։ Նա ընդգծել է, որ եթե Երևանը միանա մեկ այլ ինտեգրացիոն միավորման, ապա չի կարողանա ապահովել ԵՏՄ նորմերի և կանոնների պահպանումը, ինչը կունենա համապատասխան հետևանքներ։

«Մենք ակնկալում ենք, որ հանրապետությունը կառաջնորդվի պրագմատիզմով՝ հայկական տնտեսության բարձր աճի տեմպեր, ցածր գնաճ, ուժեղ ազգային արժույթ և հայկական արտադրանքի լայն շուկա՝ այս ամենը երաշխավորված է Ռուսաստանի հետ և Եվրասիական տնտեսական միության շրջանակներում համագործակցությամբ», - հայտարարել է փոխնախարարը։

Գալուզինը նշել է, որ, ինչպես նախկինում, Ռուսաստանը ճանաչում է Երևանը որպես Մոսկվայի բնական դաշնակից Հարավային Կովկասում: Նա հիշեցրել է, որ Ռուսաստան-Հայաստան հարաբերությունների ռազմավարական կարգավիճակը ամրագրված է ամուր իրավական շրջանակներում:

«Մենք միշտ պաշտպանել ենք ուժեղ և իսկապես ինքնիշխան հայկական պետություն: Մենք համոզված ենք, որ Ռուսաստանի և Հայաստանի միջև դաշնակցային համագործակցությանը այլընտրանք չկա: Մեր երկրների և ժողովուրդների միջև ամուր կապերը մեծապես կազմում են հանրապետության և ամբողջ տարածաշրջանի կայուն զարգացման հիմքը: Երկկողմ համագործակցությունը և համակարգված աշխատանքը եվրասիական ընդհանուր կառույցների շրջանակներում Հայաստանի ապագա բարգավաճման գրավականն են», - հայտարարել է Գալուզինը: