Ռուս-ուկրաինական խաղաղությունը մոտ է․ԱՄՆ-ի նոր սցենարը

Միացյալ Նահանգները նպատակ ունի մարտ ամսին հասնել Ռուսաստանի և Ուկրաինայի միջև խաղաղ համաձայնության կնքմանը։ Այդ հարցը քննարկվել է Վաշինգտոնի և Կիևի ներկայացուցիչների հանդիպումների ընթացքում Աբու Դաբիում, հայտնում է Reuters-ը՝ հղում անելով իր աղբյուրներին։

Աղբյուրների փոխանցմամբ՝ քննարկված պլանի համաձայն՝ հնարավոր խաղաղ համաձայնագիրը պետք է ներկայացվի համազգային հանրաքվեի, իսկ դրանից հետո Ուկրաինայում կարող են անցկացվել նախագահական ընտրություններ։ ԱՄՆ և Ուկրաինայի բանակցողները նշել են, որ քվեարկությունն ավելի նպատակահարմար է կազմակերպել մոտ ժամանակահատվածում։

Պարբերականի զրուցակիցների խոսքով՝ ամերիկյան կողմը հայտնել է ուկրաինացի գործընկերներին, որ գործընթացը ցանկալի է արագացնել, քանի որ Դոնալդ Թրամփը առաջիկա ամիսներին կենտրոնանալու է ներքին քաղաքական հարցերի վրա՝ կապված Կոնգրեսի նոյեմբերյան ընտրությունների հետ։

Միևնույն ժամանակ գործակալության այլ աղբյուրներ այդ ժամկետները համարում են անիրատեսական։ Նրանց գնահատմամբ՝ միայն հանրաքվեի և ընտրությունների կազմակերպման համար Ուկրաինայում անհրաժեշտ կլինեն օրենսդրական փոփոխություններ և առնվազն վեցամսյա նախապատրաստական փուլ։

Լուրջ խոչընդոտ է մնում նաև տարածքային հարցը։ Ռուսաստանը պնդում է Դոնբասի նկատմամբ լիակատար վերահսկողության պահանջը, ինչպես նաև մերժել է Զապորոժիեի ատոմակայանը ԱՄՆ վերահսկողության տակ փոխանցելու առաջարկը։