Սպանվել է Լիբիայի նախկին առաջնորդի որդին՝ Սեյֆ ալ-Իսլամ Քադդաֆին
Լիբիայի նախկին առաջնորդ Մուամար Քադդաֆիի որդին՝ 53-ամյա Սեյֆ ալ-Իսլամ Քադդաֆին, սպանվել է իր տանը զինված անհայտ անձանց կողմից։ Այս մասին հայտնել է քաղաքական գործչի շրջապատը։
Տեղեկությունների համաձայն՝ միջադեպը տեղի է ունեցել Լիբիայի էզ-Զինթան քաղաքում, որը գտնվում է Տրիպոլիից մոտ 160 կմ հարավ-արևմուտք։ Քադդաֆիի շրջապատի փոխանցմամբ՝ չորս զինված անձինք ներխուժել են նրա տուն և «ուղիղ բախման» ընթացքում կրակ բացել նրա ուղղությամբ։ Քադդաֆի-կրտսերի խորհրդականը լիբիական հեռուստատեսությանը հայտնել է, որ հարձակվողները նախ անջատել են տեսահսկման համակարգերը, ապա սպանել Սեյֆ ալ-Իսլամին։
Տեղեկությունը հաստատել են նաև AFP գործակալությունը և Մարսել Չեկալդին՝ Սեյֆ ալ-Իսլամ Քադդաֆիի փաստաբանը։ Նրա խոսքով՝ այս պահին անհայտ է, թե ովքեր են կանգնած սպանության հետևում և ինչ շարժառիթներ են ունեցել հարձակվողները։ Միևնույն ժամանակ փաստաբանը նշել է, որ մոտ տաս օր առաջ Քադդաֆիի մերձավոր համախոհներից մեկը իրեն տեղեկացրել էր անվտանգության հետ կապված լուրջ խնդիրների մասին։
