Նոր որոշում՝ անկանխիկ գնումների դեպքում
Հայաստանի կենտրոնական բանկը որոշել է փոփոխել և նվազեցնել անկանխիկ գնումների դեպքում տնտեսվարողներից գանձվող միջնորդավճարները։ Ասուլիսի ընթացքում, անդրադառնալով այն մտահոգությանը, որ 1-4 տոկոս միջնորդավճարները խոչընդոտում են անկանխիկ առևտրի անցմանը, Կենտրոնական բանկի նախագահ Մարտին Գալստյանը նշել է՝ բազում ազդակներ են ստանում, որ դա կարող է լինել այն խնդիրներից մեկը, որը տնտեսվարողներին որոշակիորեն խոչընդոտում է:
Նրա խոսքով՝ ուսումնասիրվել է նաև այլ երկրների փորձը՝ պարզելու համար միջնորդավճարների չափերը։ Գալստյանը հավեվել է, որ Հայաստանում գործող միջնորդավճարները էականորեն չեն տարբերվում միջազգային պրակտիկայից և բարձր չեն, սակայն հաշվի առնելով ԿԲ դիրքորոշումը՝ անկանխիկ գործարքները խթանելու նպատակով որոշվել է սահմանափակումներ կիրառել։ Նա տեղեկացրել է, որ անցյալ շաբաթվա վերջին ԿԲ խորհուրդը համապատասխան որոշում է ընդունել։
ԿԲ նախագահի ներկայացմամբ՝ ներկայումս, կախված քարտի տեսակից, տնտեսվարողների ծախսերը միջինում կազմում են 0.9-1.8 տոկոս, ինչը պայմանավորված է բանկերի կողմից կատարված ներդրումներով՝ POS տերմինալների և դրանց հետ կապված լիցենզիաների ձեռքբերման համար։ Կայացված որոշմամբ սահմանվել է, որ մարտի 1-ից միջնորդավճարները Arca քարտերի համար կկազմեն 0.5 տոկոս, իսկ միջազգային քարտերի համար՝ 0.9 տոկոս։ Նա հավելել է, որ Visa-ի և MasterCard-ի սպասարկման վճարները կապ չունեն բանկային համակարգի կողմից գանձվող միջնորդավճարների հետ։
ԿԲ հաշվարկներով՝ այս որոշման արդյունքում բանկային համակարգի վնասը կկազմի մոտ 2 միլիարդ դրամ։ Մարտին Գալստյանի խոսքով՝ կայացված որոշումը կլուծի տնտեսվարողների խնդիրը, իսկ հետագա վիճակագրությունը ցույց կտա՝ անկանխիկ առևտրի հիմնական խոչընդոտը միջնորդավճարն էր, թե առկա էին այլ գործոններ։
