Մեդվեդևը առաջարկել է տնտեսագիտություն սովորել ԿԺԴՀ-ից

Ռուսաստանի անվտանգության խորհրդի փոխնախագահ Դմիտրի Մեդվեդևը հայտարարել է, որ Հյուսիսային Կորեան կարող է օրինակ ծառայել այն առումով, թե ինչպես է հնարավոր կարճ ժամանակում մոբիլիզացնել տնտեսությունը նույնիսկ սահմանափակ ռեսուրսների և արտաքին ճնշման պայմաններում։

Մեդվեդևի խոսքով՝ Կորեական Ժողովրդադեմոկրատական Հանրապետությունը կարողացել է արդյունավետ կերպով կազմակերպել տնտեսական համակարգը՝ գործելով «փոքր հնարավորություններով» և «ամբողջական շրջափակման» պայմաններում։ Նրա գնահատմամբ՝ ԿԺԴՀ-ի փորձը ցույց է տալիս, որ պետական կառավարման խիստ մոդելը կարող է ապահովել արագ կենտրոնացում և արդյունք ռազմավարական ոլորտներում։

Նա առանձնահատուկ ուշադրություն է դարձրել Հյուսիսային Կորեայի պաշտպանական արդյունաբերությանը՝ նշելով, որ երկրում ձևավորվել է լուրջ ռազմարդյունաբերական համալիր, որը, իր խոսքով, «առաջացնում է շատ մեծ հարգանք»։

Մեդվեդևը չի մանրամասնել, թե կոնկրետ որ մեխանիզմներն է նպատակահարմար համարում կիրառել այլ երկրների կողմից, սակայն ընդգծել է, որ ԿԺԴՀ-ի օրինակը կարող է հետաքրքիր լինել տնտեսության մոբիլիզացիոն մոդելների ուսումնասիրության տեսանկյունից։