Այդ «հիմարները» պետք է փոխեն իրենց հոդվածը․ շուտով կտեսնենք՝ ինչ կանեմ․ Դոնալդ Թրամփ

ԱՄՆ նախագահ Դոնալդ Թրամփը պահանջել է, որպեսզի New York Times թերթը անհապաղ փոփոխի հրապարակումը, որտեղ նշվում էր, թե նա իբր հրաժարվել է Հարվարդի համալսարանի կողմից ԱՄՆ կառավարությանը 200 միլիոն դոլար վճարելու պահանջներից։ Թրամփը հայտարարել է, որ հոդվածում ներկայացված տեղեկությունները չեն համապատասխանում իրականությանը և սպառնացել է պարբերականին դատական հայցով։

Թերթն ավելի վաղ հաղորդել էր՝ հղում անելով չորս իրազեկ աղբյուրների, որ Թրամփի վարչակազմը իբր պատրաստ էր հրաժարվել Հարվարդի համալսարանին ներկայացրած 200 միլիոն դոլարի պահանջից՝ իշխանությունների և համալսարանի միջև առաջացած վեճը կարգավորելու նպատակով։ 

Հրապարակումից հետո ԱՄՆ նախագահը հայտարարել է, որ իր վարչակազմը այժմ Հարվարդի համալսարանից պահանջում է արդեն մեկ միլիարդ դոլարի փոխհատուցում և մտադիր չէ շարունակել որևէ համագործակցություն կրթական հաստատության հետ։

Թրամփը Truth Social սոցիալական հարթակում գրառում է կատարել, քննադատելով թերթին։ Սպիտակ տան ղեկավարի պնդմամբ՝ հոդվածը «ամբողջությամբ սխալ է» և դիտավորյալ խեղաթյուրում է իր վարչակազմի դիրքորոշումը։ Նա նաև նշել է, որ New York Times-ի կողմից իր գործունեության լուսաբանումը մշտապես եղել է ոչ ճշգրիտ։

«Այդ «հիմարները» պետք է փոխեն իրենց հոդվածը։ Շուտով կտեսնենք, թե ինչ կարող եմ անել այս խարդախների հետ», - գրել է Թրամփը։

Հավելենք՝ թերթը դեռևս պաշտոնական արձագանք չի ներկայացրել։