Մասլեննիկովը՝ Հայաստանից ԵՄ-ի հնարավոր պահանջների մասին

Եվրամիության ղեկավարությունը որոշ փուլում կպահանջի Հայաստանի լիակատար քաղաքական համերաշխություն, այդ թվում՝ Բրյուսելի հակառուսական կուրսի հետ։ Այս մասին TASS-ին տված հարցազրույցում հայտարարել է Ռուսաստանի արտաքին գործերի նախարարության Եվրոպական հարցերով դեպարտամենտի տնօրեն Վլադիսլավ Մասլեննիկովը։

«Որոշակի պահի Բրյուսելը սկսում է ցանկացած թեկնածու երկրից պահանջել լիակատար համերաշխություն իր արտաքին քաղաքականության հետ, որն այժմ բացահայտ հակառուսական է», - նշել է դիվանագետը՝ մեկնաբանելով Հայաստանի եվրաինտեգրման ծրագրերը։ Նա նաև հավելել է, որ հույս ունի՝ Երևանը գիտակցում է, որ նույնիսկ Բրյուսելի բոլոր պահանջների կատարումը չի երաշխավորում Եվրամիության անդամակցությունը։

Մասլեննիկովը որպես օրինակ հիշատակել է Արևմտյան Բալկանների երկրները, որոնք, նրա խոսքով, տասնամյակներ շարունակ գտնվում են «ԵՄ անդամակցության հերթում»։ Նա նշել է, որ Ալբանիան այդ գործընթացում է 2000 թվականից, Հյուսիսային Մակեդոնիան՝ 2004-ից, Չեռնոգորիան՝ 2008-ից, իսկ Սերբիան՝ 2009-ից՝ կատարելով եվրոպացի բյուրոկրատների խիստ, հաճախ բնակչության համար ոչ ժողովրդական պահանջները, սակայն դեռևս չեն մոտեցել ԵՄ-ին անդամակցելուն։

Դիվանագետը նաև ընդգծել է, որ ԵՄ անդամակցությունը, հատկապես ներկայիս պայմաններում, չի երաշխավորում թեկնածու երկրների բարգավաճումը։ Նրա խոսքով՝ Բալթյան երկրներում, որոնք վերջերս նշել են Եվրամիությանն անդամակցության 20-ամյակը, տնտեսական ցուցանիշներն ու ժողովրդագրական իրավիճակը «մեղմ ասած, աննշան են»։