Զելենսին կոչ է արել, որ ԱՄՆ-ն պատրաստ լինի փոխզիջման

Ուկրաինան չի փոխել իր դիրքորոշումը տարածքների վերաբերյալ։ Այս մասին հայտարարել է Ուկրաինայի նախագահ Վլադիմիր Զելենսկին Լիտվայի նախագահ Գիտանաս Նաուսեդայի և Լեհաստանի նախագահ Կարոլ Նավրոցկիի հետ Վիլնյուսում կայացած համատեղ մամուլի ասուլիսում։

Զելենսկու խոսքով՝ Ռուսաստանը վաղուց ամեն ինչ անում է «Ուկրաինային արևելքից հեռու պահելու» համար, բայց չի կարողացել հասնել այս նպատակին առաջնագծում։

«Բոլորը գիտեն մեր դիրքորոշումը։ Մենք պայքարում ենք մեր սեփական տարածքի համար, այլ ոչ թե ուրիշի։ Սրանք երկու սկզբունքորեն տարբեր դիրքորոշումներ են՝ ուկրաինական և ռուսական։ Ամերիկացիները փորձում են փոխզիջում գտնել։ Մենք համաձայն ենք բանակցել եռակողմ ձևաչափով։ Սակայն փոխզիջումը պահանջում է, որ բոլոր կողմերը պատրաստ լինեն։ Ի դեպ, նաև ամերիկյան կողմը», - ասել է Զելենսկին։

Մեկնաբանելով Աբու Դաբիում կայացած բանակցությունները՝ Ուկրաինայի նախագահը նաև ասել է, որ հանդիպումների ժամանակ քննարկվել է 20 կետանոց խաղաղության ծրագիրը և խնդրահարույց հարցեր, որոնք շատ էին, բայց դրանց թիվը նվազել է։

Զելենսկին հավելել է, որ Ուկրաինան սպասում է ԱՄՆ-ից և Եվրոպայից անվտանգության երաշխիքների, որոնք «հնարավորություն են տալիս որոշել այս պատերազմի ավարտի կոնկրետ ամսաթիվը»։

Նա նշել է, որ ԱՄՆ-ի հետ երկկողմ անվտանգության երաշխիքները 100%-ով պատրաստ են, և Կիևն այժմ սպասում է ստորագրման ամսաթվին և վայրին։