Վրաստանի լեռներում ձնահոսքը ծածկել է ռուս զբոսաշրջիկներին. ԶԼՄ

Վրաստանի լեռներում ձնահոսքը ծածկել է ռուս զբոսաշրջիկներին. նրանք մոտ երեք ժամ է՝ ձյան տակ են։ Նրանց որոնում են փրկարարները,  այս մասին փոխանցում է Shot  տելեգրամյան ալիքը։

Ալիքի տվյալներով՝ ձնահոսքը տեղի է ունեցել Տետնուլդ գագաթին՝ Վերին Սվանեթիա տարածաշրջանում։ Այն ծածկել է դահուկորդների և սնոուբորդիստների շուրջ 20 հոգանոց խմբին, որոնց թվում կան նաև ռուսաստանցիներ։

Մի քանի մարդ կարողացել է փրկվել ինքնուրույն։ Մեկին փրկարարները դուրս են բերել այլ զբոսաշրջիկների օգնությամբ․ նա ողջ է և հոսպիտալացվել է։ Եվս մեկ մարդ հայտնաբերվել է անգիտակից վիճակում, նրա վիճակը ներկայումս մնում է անորոշ։

Ձյան տակ մնացածների ստույգ թիվը դեռ հայտնի չէ։ Փրկարարական գործողությունը շարունակվում է արդեն մոտ երեք ժամ։