Փիմբլեթը սկանդալային հայտարարություն է արել Ծառուկյանի հասցեին
UFC-ի թեթև քաշային կարգի բրիտանացի ներկայացուցիչ Փեդի Փիմբլեթը կոշտ մեկնաբանություններով է հանդես եկել Արման Ծառուկյանի վերջին ելույթների վերաբերյալ՝ անդրադառնալով նրա գրեփլինգի մրցումներին և տարվա եզրափակիչ գոտեմարտին։
Տարվա ընթացքում գրեփլինգի կանոններով չորս հաղթանակ գրանցելուց հետո Արման Ծառուկյանը ոչ-ոքի արդյունք է արձանագրել Շարաբուտդին Մագոմեդովի հետ մենամարտում։ Այդ հանգամանքից օգտվելով Փիմբլեթը քննադատել է Ծառուկյանին։ The MMA Guru-ին տված հարցազրույցում նա նշել է, որ իր վրա տպավորություն չի թողել Ծառուկյանի պայքարը գետնի վրա՝ ընդգծելով, որ վերջինս խնդիրներ է ունեցել նույնիսկ հարվածային ոճի մարտիկի դեմ։
Փիմբլեթը նաև ակնարկել է, որ իրեն չի համոզել Ծառուկյանի հաղթանակը Դեն Հուկերի նկատմամբ UFC-ում՝ չնայած այն հանգամանքին, որ մենամարտը ավարտվել էր վաղաժամ՝ խեղդող հնարքով երկրորդ ռաունդում։ Նրա խոսքով՝ Հուկերի գետնի վրա պայքարի մակարդակը բարձր չի եղել։
Միաժամանակ բրիտանացի մարտիկը նշել է, որ նախկինում ինքն էլ ակտիվ մասնակցել է գրեփլինգի մրցումների, սակայն ներկայումս կենտրոնացած է բացառապես MMA մենամարտերի վրա։ Նա հավելել է, որ յուրաքանչյուր մարզիկ ազատ է ընտրելու իր զարգացման ուղին։
Նշենք, որ հունվարի 24-ին Լաս Վեգասում կայանալիք UFC 324 մրցաշարում Փեդի Փիմբլեթը Ջասթին Գեյջիի հետ մենամարտում կփորձի նվաճել թեթև քաշային կարգի ժամանակավոր չեմպիոնի գոտին, իսկ Արման Ծառուկյանը նախատեսում է հանդես գալ որպես այդ գոտեմարտի պահեստային մարտիկ։
