Ալեն Սիմոնյանի հայտարարությունները որակվում են որպես սադրիչ. Զախարովա

Ռուսաստանի ԱԳՆ ներկայացուցիչ Մարիա Զախարովան արձագանքել է Հայաստանի Անվտանգության խորհրդի քարտուղար Ալեն Սիմոնյանի հայտարարություններին:

«Մոսկվայում ուշադրություն են դարձրել Ռուսաստանի նկատմամբ բացահայտ թշնամաբար տրամադրված զանգվածային լրատվամիջոցին Հայաստանի Անվտանգության խորհրդի քարտուղարի պաշտոնում վերջերս նշանակված Ա. Ռ. Սիմոնյանի հարցազրույցին: Ազգային ժողովի նախագահի պաշտոնը զբաղեցնելու ընթացքում նա պարբերաբար հանդես էր գալիս երկակի հայտարարություններով, այդ թվում՝ ռուս-հայկական հարաբերությունների վերաբերյալ: Այս անգամ օտարերկրյա գործակալ լրագրողի հետ ուղիղ եթերում Անվտանգության խորհրդի նորանշանակ քարտուղարը տրվել է գիտակցաբար սադրիչ ձևակերպված հարցին, որը նրան ներքաշել է ուկրաինական խունտայի և նրա արևմտյան հովանավորների կողմից հրահրված սպեկուլյացիաների մեջ մեր երկրում հնարավոր մոբիլիզացիայի վերաբերյալ, ինչը բազմիցս հերքվել է Ռուսաստանի պաշտոնատար անձանց կողմից:

Ցավով արձանագրվում է, որ պաշտոնական Երևանի ներկայացուցիչների կողմից Մոսկվայի հետ երկկողմ համագործակցությունը խաթարող հրապարակային հայտարարությունների տարածման միտումը շարունակվում է: Ա. Ռ. Սիմոնյանի հայտարարությունները որակվում են որպես սադրիչ: Ըստ էության, դրանք խրախուսում են Ռուսաստանի քաղաքացիներին անօրինական գործողությունների դիմել և ավանդական հայկական հյուրընկալությանը տալիս են թունավոր քաղաքական երանգավորում:

Ա. Ռ. Սիմոնյանի հիշատակված մեկնաբանություններում, ով 2026 թվականի փետրվարին Ռուսաստան կատարած այցի ընթացքում ակտիվորեն խոսում էր ռուս-հայկական կապերի զարգացման կարևորության մասին (այդ թվում՝ Հայաստանի համար), տեսանելի է հանրապետության իշխանությունների՝ Արևմուտքին և Կիևի ռեժիմին հաճոյանալու ձգտման ևս մեկ ապացույց»,– հայտնել է Զախարովան: