ՄԱԿ-ը քննադատել է Իսրայելի քաղաքականությունը
ՄԱԿ-ի Մարդու իրավունքների բարձր հանձնակատարի գրասենյակը (ՄԻԲՀԳ) հրապարակել է զեկույց, որտեղ նշվում է, որ Իսրայելի իշխանությունների վարած քաղաքականությունը պաղեստինցիների նկատմամբ օկուպացված Հորդանանի Արևմտյան ափում, ներառյալ Արևելյան Երուսաղեմը, ունի ռասայական սեգրեգացիայի և ապարտեիդի հատկանիշներ։
Զեկույցում ընդգծվում է, որ պաղեստինցիները շարունակաբար ենթարկվում են հողերի լայնածավալ բռնագրավման և բնական ռեսուրսների հասանելիության սահմանափակման։ ՄԻԲՀԳ փորձագետների գնահատմամբ՝ այդ գործընթացները հանգեցրել են բնակարանների և հողերի կորստի, ինչպես նաև համակարգային խտրականության այլ դրսևորումների։
Փաստաթղթում նշվում է նաև, որ պաղեստինցիները հաճախ ենթարկվում են քրեական հետապնդման ռազմական դատարաններում, որտեղ, ըստ զեկույցի, պարբերաբար խախտվում են արդար դատաքննության և իրավական պատշաճ ընթացակարգի նրանց իրավունքները։ ՄԱԿ-ի փորձագետների կարծիքով՝ գործող քաղաքականությունը նպատակ ունի երկարաժամկետ դարձնել բաժանումը, սեգրեգացիան և վերահսկողությունը պաղեստինցիների նկատմամբ։
Զեկույցի համաձայն՝ Արևմտյան ափում իսրայելցի վերաբնակիչների և պաղեստինցիների համար գործում են տարբեր իրավական և վարչական համակարգեր, ինչը հանգեցնում է անհավասար վերաբերմունքի մի շարք կարևոր ոլորտներում, այդ թվում՝ տեղաշարժի ազատության և հողի ու ջրի հասանելիության հարցերում։
