Գրոհել կոչվածը չկա. ԱՆ նախարարի խոսնակը՝ հունվարի 1-ից գործարկված առողջության ապահովագրության համակարգի մասին

Գրոհել կոչվածը չկա, շատ հանգիստ տեմպով գնում են քաղաքացիները: Համապետական մեծ մասշտաբի բարեփոխում է՝ խնդիրներ կլինեն, բայց այսօրվա դրությամբ գլոբալ առումով մեծ խնդիր չունենք: Ունենք զանգերի կենտրոն, թեժ գիծ, նախարարի հանձնարարականով նաև ստեղծվել է թելեգրամյան խումբ՝ որտեղ բժիշկներն են, օպերատիվ կապը ապահովելու համար: Այս մասին Tert.am-ի հետ զրույցում ասաց ՀՀ առողջապահության նախարարություն մամուլի քարտուղար Մարիամ Ծատրյանը՝ անդրադառնալով հունվարի 1-ից գործարկված առողջության ապահովագրության համակարգի ներկա իրավիճակին:

«Հունվարի 1-ից գործարկվել է, քաղաքացիները բուժօգնություն ստացել են: Նախարարը հրապարակում էր արել, առաջին օրը՝ մոտավորապես 2,700 պացիենտի դիմելիություն ունեինք: Այսօր էլ շրջայց ենք արել որոշ բժշկական կազմակերպություններում, հենց այս պահին Նորք Մարաշում ենք՝ հետաքրքրվում ենք և քաղաքացիներից և բժիշկներից»:

Անդրադառնալով այն հարցին, թե արդյո՞ք գործարկվող համակարգը մինչև այս պահը խնդիրներ չի առաջացրել, քարտուղարը պատասխանեց, որ խնդիրները միայն տեխնիկական են. «Գուցե լինեն դժվարություններ. լինում է, որ Արմեդ համակարգի հետ կապված տեխնիկական խնդիր լինի: Լինում է նաև, որ պոլիկլինիկայի բժիշկը դեռևս չհասկանա, թե ոնց ուղեգրել՝ դրա համար էլ ունենք ընթացիկ զանգերի կենտրոն, որտեղ զանգում են և բժիշկները, և քաղաքացիները, իրենց հուշում ենք՝ որովհետև մեծ բարեփոխում է, գուցե լինեն նաև տեխնիկական խնդրներ»:

Ապահովագրական ծածկույթի ներքո՝ քարտուղարի խոսքով, հիմնականում ընդգրկված են հիվանդացության մեծ բեռ առաջացնող հիվանդությունները: Դրանք են՝ քաղցկեղը, սրտանոթային հիվանդությունները, մանկական ծառայությունները 0-18 տարեկանների համար, 65+ ների համար կա մեծ փաթեթ՝ սկսած կատարակտից, որը ամենատարածված հիվանդությունն է. «Հիմնականում շտապ և անհետաձգելի դեպքերը տեղում է սպասարկում իրականացվում՝ արագ կերպով, բայց մնացած վիրահատությունները, որոնք այդ պահին կյանքին չեն սպառնում, հերթագրումով է կատարվում»,- եզրափակեց նա: