Էստոնիան նախատեսում է ավարտել Ռուսաստանի հետ սահմանային ցանկապատը

Էստոնիայի իշխանությունները մտադիր են մինչև 2027 թվականի վերջը ավարտին հասցնել Ռուսաստանի հետ արևելյան սահմանի ողջ սահմանային ենթակառուցվածքների կառուցումը։ Այս մասին հայտարարել է Էստոնիայի ոստիկանության և սահմանապահ ծառայության փոխտնօրեն Վեյկո Կոմմուսաարը՝ նշելով, որ ծրագիրն իրականացվում է ըստ փուլերի։

Նրա խոսքով՝ ցամաքային սահմանի այն հատվածներում, որտեղ աշխատանքներ էին նախատեսված 2025 թվականին, շինարարությունն արդեն ավարտված է։ 2026 թվականի ընթացքում նախատեսվում է ցանկապատ տեղադրել նաև այն հատվածներում, որտեղ սկզբնական նախագծով նման աշխատանքներ նախատեսված չէին։

Բացի այդ, ոստիկանության և սահմանապահ ծառայությունը շարունակելու է Նարվա գետի երկայնքով սահմանային հսկողության ենթակառուցվածքների զարգացումը։ Արդեն կառուցված հինգ դիտարկման կետերին զուգահեռ ներկայում իրականացվում է ևս ինը նոր դիրքերի շինարարություն՝ անհրաժեշտ տեխնիկական միջոցներով։

Միևնույն ժամանակ, Ռուսաստանի հետ սահմանի ամրաշինական աշխատանքների մի մասը հետաձգվել է։ Բալթյան պաշտպանական գծի առաջին հինգ բունկերների շինարարությունը սկսվել է միայն 2024 թվականի դեկտեմբերին, մինչդեռ դրանք նախատեսվում էր ավարտել 2025 թվականի աշնանը։ Էստոնիայի պաշտպանության պետական ներդրումների կենտրոնի տվյալներով՝ ժամկետների հստակեցումը դժվարացել է մրցույթի կազմակերպման խնդիրների պատճառով։

Էստոնիա-Ռուսաստան սահմանի ընդհանուր երկարությունը կազմում է 338 կիլոմետր, սակայն երկու երկրների միջև սահմանը մինչ օրս իրավականորեն ամբողջությամբ ձևակերպված չէ։ Սահմանազատման վերաբերյալ համաձայնագրերը ստորագրվել են 2014 թվականին, սակայն դեռևս չեն վավերացվել։