Եղջերուների վնասումը ենթադրում է օրենքով սահմանված պատասխանատվություն
ՀՀ շրջակա միջավայրի նախարարությունը տեղեկացնում է՝ այսօր համացանցում տեսանյութ է հայտնվել, որտեղ երևում է, թե ինչպես են բնություն բաց թողնված Կովկասյան ազնվացեղ եղջերուները զբոսնում Լոռու մարզի բնակավայրերից մեկում։
«Խնդրում ենք չմոտենալ, չփորձել կերակրել և չվնասել կենդանուն, ինչպես նաև չխոչընդոտել նրանց բնական տեղաշարժը։
Եղջերուների տեղաշարժը հսկվում է ռադիովզկապով։
Կենդանիները գտնվում են պետական պահպանության ներքո, և դրանց վնասումը ենթադրում է օրենքով սահմանված պատասխանատվություն։
Ազնվացեղ եղջերուին վնասելու դեպքում պետությանը պատճառված վնասը հաշվարկվելու է 15 մլն դրամ, ինչպես նաև սահմանված են պատասխանատվության միջոցներ ՀՀ Քրեական օրենսգրքի 386-րդ հոդվածով։ Ձեր պատասխանատու վարքագիծը նպաստում է բնության պահպանությանը»։
Ավելի վաղ հայտնել էինք, որ ազնվացեղ եղջերուի անհետացման դեպքով հարուցվել է քրեական վարույթ:
