Կոռուպցիոն ռիսկերը և հնարավոր չարաշահումները կանխարգելելու համար կգործեն նոր մեխանիզմներ

Կառավարությունը հավանություն է տվել «Հանրային ծառայության մասին» և «Կոռուպցիայի կանխարգելման հանձնաժողովի մասին» օրենքներում լրացումներ նախատեսող օրինագծերին։ Փոփոխությունների նպատակն է պետական կառավարման համակարգում ներդնել բարեվարքության ուսումնասիրության նոր և պարտադիր կառուցակարգեր։

Օրինագծերով նախատեսվում է, որ բարեվարքության ուսումնասիրությունը կկիրառվի վարչապետի, փոխվարչապետների, նախարարների, նրանց խորհրդականների, այդ թվում՝ հասարակական հիմունքներով նշանակված խորհրդականների, ինչպես նաև նախարարների տեղակալների նկատմամբ։ 

Կառավարության հիմնավորմամբ՝ բարեվարքության պարտադիր ստուգումների ներդրումը կխթանի պետական համակարգի թափանցիկության բարձրացումը և կուժեղացնի հանրային վստահությունը պետական կառույցների նկատմամբ։ Միևնույն ժամանակ, նման մեխանիզմների հետևողական կիրառումը կօգնի նվազեցնել կոռուպցիոն ռիսկերը և կանխարգելել հնարավոր չարաշահումները։

Նախագծերի ընդունմամբ ակնկալվում է նաև բարձրացնել հանրային պաշտոն զբաղեցնող անձանց հաշվետվողականությունը և ընդլայնել հանրային վերահսկողության գործիքակազմը՝ ամրապնդելով կոռուպցիայի կանխարգելման ինստիտուցիոնալ հիմքերը։