Ռուսական օդային տարածքից օգտվելու արգելքի պատճառով նվազել է ամերիկյան ավիափոխադրողների մրցունակությունը. ՌԴ ԱԳՆ
Ռուսաստանը կողմ է ԱՄՆ-ի հետ ուղիղ ավիահաղորդակցության շուտափույթ վերականգնմանը և պատրաստ է ապաքաղաքականացված երկխոսության՝ առանց նախապայմանների։ Այս մասին հայտարարել է ՌԴ ԱԳՆ Հյուսիսային Ատլանտիկայի դեպարտամենտի տնօրեն Ալեքսանդր Գուսարովը։
Նրա խոսքով՝ Ռուսաստանի և ԱՄՆ-ի միջև ուղիղ չվերթների վերականգնումը վաղուց հասունացած հարց է և կդառնար երկկողմ երկխոսության նորմալացման ու փոխադարձ վստահության ամրապնդման ակնառու ազդանշան։ Գուսարովն ընդգծել է, որ ուղիղ ավիահաղորդակցությունը զգալիորեն կհեշտացներ երկու երկրների քաղաքացիների ճամփորդությունները, ովքեր այժմ ստիպված են ժամանակ և միջոցներ ծախսել տևական վերանստումների (տրանզիտների) վրա։
ՌԴ ԱԳՆ-ում նշել են, որ ավիահաղորդակցության նորմալացումն առաջին հերթին ձեռնտու կլիներ ամերիկյան ավիացիոն ոլորտին, որը զգալի կորուստներ է կրել 2022 թվականին սահմանված սահմանափակումներից հետո։ Մասնավորապես, ռուսական օդային տարածքից օգտվելու արգելքի պատճառով նվազել է ամերիկյան ավիափոխադրողների մրցունակությունը, ինչի մասին, ինչպես շեշտել է դիվանագետը, բացահայտ խոսում են ԱՄՆ գործարար շրջանակների ներկայացուցիչները։
Գուսարովը հայտնել է, որ Ռուսաստանը դեռ փետրվարին Ստամբուլում կայացած խորհրդակցությունների ժամանակ բարձրացրել է «բաց երկնքի» հարցը։ Տարվա ընթացքում ռուսական կողմը ամերիկյան ավիացիոն իշխանություններին է փոխանցել առաջարկներ՝ ավիահաղորդակցության վերագործարկման կոնկրետ քայլերի հաջորդականությամբ։
ՌԴ ԱԳՆ-ում հույս ունեն, որ ԱՄՆ-ն քաղաքական կամք կդրսևորի «ավիաշրջափակումը» վերացնելու համար, որը, Մոսկվայի գնահատմամբ, կորցրել է իր գործնական իմաստը։ Միևնույն ժամանակ, գերատեսչությունում ընդգծում են, որ պատրաստ են քննարկել ոչ միայն ավիահաղորդակցությունը, այլև փոխգործակցության ավելի լայն ձևաչափեր, ներառյալ հնարավոր մեգանախագծերը՝ չնայած ՆԱՏՕ-ի երկրների կողմից պահպանվող ռիսկերին ու սպառնալիքներին։
Նոյեմբերի 19-ին էլ ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ Ռուսաստանը հանդես է եկել ԱՄՆ-ի հետ ավիահաղորդակցությունը վերականգնելու առաջարկով, սակայն Վաշինգտոնի կողմից այս հարցում որևէ արձագանք չկա։
