Անկանխիկի վարքագիծը առևտրում կտրուկ փոխվել է. ՊԵԿ նախագահ
Բյուջեի հավաքագրումները բավականին լավ են, երկնիշ աճերը, որոնց մասին պարբերաբար խոսում ենք այս նիստերին, պահպանվում են: Դեկտեմբերի 20-ին մուտքերի արդյունքներով հստակ պատկեր կունենանք: Այդ մասին Կառավարության նիստին ասաց ՊԵԿ նախագահ Էդուարդ Հակոբյանը՝ պատասխանելով վարչապետ Նիկոլ Փաշինյանի հարցին, թե ինչպես են պետբյուջեի հավաքագրումները:
«ՀԴՄ-ների մասով ևս պատկերը բավականին լավն է, ու եթե նայենք բոլոր կտրոնների քանակով, 18 տոկոսանոց աճ ունենք, հասույթով 11 տոկոսանոց աճ ունենք:
Բայց այստեղ ուրախալին այն է, որ անկանխիկի վարքագիծը առևտրում կտրուկ փոխվել է: Այս թվերի համեմատությամբ կտրոնների քանակով անկանխիկի 52 տոկոսանոց աճ ունենք, իսկ հասույթների՝ 31 տոկոսանոց աճ: Այս կտրոնների ու հասույթների մեծ մասն ապահովվում է անկանխիկ վճարումների միջոցով»,- ասաց ՊԵԿ նախագահը:
