Ռուսաստանը պատրաստ է օգնել Իրանին միջուկային ծրագրում լուծումներ գտնել. Լավրով
Ռուսաստանը պատրաստ է օգնել Իրանին իրանական միջուկային ծրագրի համար ընդունելի լուծումներ գտնելու հարցում։ Այս մասին հայտարարել է Ռուսաստանի արտաքին գործերի նախարար Սերգեյ Լավրովը Իրանի արտաքին գործերի նախարար Աբբաս Արաղչիի հետ բանակցություններից հետո կայացած մամուլի ասուլիսում։
Լավրովը ընդգծել է, որ իր իրանցի գործընկերոջ հետ քննարկել է Իրանի միջուկային ծրագրի շուրջ ստեղծված իրավիճակը՝ հավելելով, որ արևմտյան երկրները որդեգրել են «բացարձակապես ագրեսիվ, հակաիրանական և անօրինական գիծ»։
«Ռուսաստանը ևս մեկ անգամ հաստատում է իր պատրաստակամությունը՝ օգնելու իր իրանցի ընկերներին Արևմուտքի կողմից ստեղծված միջուկային ճգնաժամը լուծելու համար ընդունելի լուծումներ գտնելու հարցում», - նշել է նախարարը։
Արտգործնախարարի խոսքով՝ արևմտյան եվրոպացիները, խախտելով բոլոր համաձայնագրերը և ՄԱԿ-ի Անվտանգության խորհրդի նորմերը, անում են ամեն ինչ՝ Իրանի դեմ ՄԱԿ-ի պատժամիջոցները վերականգնելու համար։ «Այս պատժամիջոցները վաղուց, ամիսներ առաջ են լրացել՝ ՄԱԿ-ի Անվտանգության խորհրդի համապատասխան որոշումների հետ միասին», - հավելել է Լավրովը։
