Ավինյանն իմ ընկերն է, Ալեն Սիմոնյանն ընկերս չէ, առաջիկայում կխոսեմ դրա մասին. Հայկ Սարգսյան

Ես ինձ տեսնում եմ Ազգային ժողովում, որևէ ամբիցիա չունեմ այլ պաշտոն զբաղեցնելու: Տիգրան Ավինյանը չի մասնակցել նիստին և դեմ չի եղել, նա իմ ընկերն է, եթե ինքը տեղում լիներ՝ կողմ կքվեարկեր: Այս մասին ճեպազրույցի ժամանակ ասել է ԱԺ «Քաղաքացիական պայմանագիր» կուսակցության անդամ Հայկ Սարգսյանը:

Հարցին, թե արդյոք վարչությունը ներկայացրել է հիմնավորում մերժման համար, Հայկ Սարգսյանը պատասխանել է.

«Ինձ որևէ հիմնավորում չի ներկայացվել, վարչության անդամներից մեկը բանավոր խոսքով փոխանցել է վարչության դիրքորոշումը»:

Անդրադառնալով իր բողոքարկմանը՝ Հայկ Սարգսյանը ասել է, որ եթե նեղված լիներ՝ չէր բողոքարկի, այլ կգնար տուն:

«Ես չեմ ցանկանում դավաճանել իմ սկզբունքները և այն ժողովրդին, որը մեզ բերել է իշխանության: 2018 թվականի ապրիլի 22-23-ին, երբ 100,000 մարդիկ դուրս եկան փողոց, ես կալանքի մեջ էի, ինձ սպառնում էր մինչև 8 տարի ազատարկում: Եթե ժողովուրդը դուրս չգար պայքարի, ես կգտնվեի անազատության մեջ»:

Տիգրան Ավինյանի մասին՝ Հայկ Սարգսյանը հավելել է, որ համարում է նրան Երևանի լավագույն քաղաքապետներից մեկը, եթե ոչ ամենալավը:

Հարցին, թե ի՞նչ հարաբերություններ ունի Հայկ Սարգսյանն Ալեն Սիմոնյանի հետ, նա էլ է իր ընկերն այնպես, ինչպես Տիգրան Ավինյանը, պատասխանել է, որ ոչ՝ առաջիկայում կխոսի դրա մասին:

«Ակնկալիք ունեմ, որ վարչությունը ինձ կլսի, ու նոր որոշում կկայացնի»,- հավելել է Սարգսյանը: