Լավրովը Եվրամիությանը համարում է գլխավոր գլոբալ սպառնալիք
Ռուսաստանի արտաքին գործերի նախարար Սերգեյ Լավրովը հայտարարել է, որ աշխարհի տարբեր տարածաշրջաններում ընթացող գործընթացների ֆոնին ամենագլխավոր սպառնալիքը հանդիսանում են Եվրամիության գործողությունները, ավելի ճիշտ՝ այն քաղաքական էլիտան, որը, նրա բնորոշմամբ, զավթել է իշխանությունը Բրյուսելում։ Այդ մասին նա նշել է Իրանի պետական հեռուստատեսության և ռադիոհեռարձակման կորպորացիային տված հարցազրույցում։
Լավրովի խոսքով՝ այդ էլիտան փորձում է ենթարկեցնել ազգային կառավարություններին և թելադրել սեփական քաղաքական օրակարգը։
«Եվրոպան բազմիցս դարձել է բոլոր չարիքների աղբյուրը, խորը ճգնաժամերի ծնունդը»,- ընդգծել է ՌԴ արտաքին քաղաքական գերատեսչության ղեկավարը։
Նրա գնահատմամբ՝ ներկայումս Եվրոպան կրկին փորձում է բոլորին պարտադրել իր պայմաններն ու ցանկությունները, ինչը, ըստ Լավրովի, անմիջականորեն կապված է ուկրաինական ճգնաժամի շուրջ զարգացումների հետ։
