TRIPP-ը շատ ամուր երաշխիքներ է տալիս Հայաստանին․ ԱՄՆ դեսպան

Թուրքիան ԱՄՆ նախկին նախագահ Դոնալդ Թրամփի ուղու՝ TRIPP-ի տեսլականի կարևոր տարր է։ Այս մասին ՍիվիլՆեթին տված հարցազրույցում հայտարարել է Հայաստանում ԱՄՆ դեսպան Քրիստինա Քվինը։

Նրա խոսքով՝ նախագիծը կարող է դառնալ իսկապես ազդեցիկ, եթե օգտագործվի երկաթուղու այն հատվածը, որը Նախիջևանով անցնելով՝ Հայաստանով, մասնավորապես Շիրակի մարզով, կհասնի Թուրքիայի Կարս նահանգ։ Դեսպանը նշել է, որ Թուրքիան ունի բավականին զարգացած երկաթուղային ցանց, ինչը նախագծին լրացուցիչ կարևորություն է հաղորդում։

Քվինը հայտնել է, որ ԱՄՆ-ն այս հարցում ուղիղ աշխատում է Թուրքիայի հետ՝ ընդգծելով, որ Հայաստանը նույնպես ակտիվ շփումների մեջ է Թուրքիայի հետ՝ փորձելով իրականացնել անհրաժեշտ քայլերը տեսլականի կյանքի կոչման համար։

Նրա խոսքով՝ հյուսիսից հարավ և արևելքից արևմուտք անվտանգ և ապահով ճանապարհի ստեղծումը, որը կանցնի Նախիջևանով, Հայաստանով՝ դեպի Գյումրի և Կարս, կբացի նոր տարանցիկ ուղի։ Դեսպանի գնահատմամբ՝ այդ ճանապարհը կօգնի կապել արևելքն ու արևմուտքը, ինչից կշահեն գրեթե բոլոր ներգրավված երկրները, սակայն առավել մեծ օգուտ կարող է ստանալ Հայաստանը, որի արևելյան և արևմտյան սահմանները ավելի քան 30 տարի փակ են եղել։

Ներկայացնելով TRIPP-ի հարցում ԱՄՆ տեսլականը՝ Քվինը նշել է, որ այն մի երթուղի է, որը վերջնական արդյունքում կկապի Կենտրոնական Ասիան Արևմտյան Եվրոպային։ Նրա համոզմամբ՝ Կովկասը երկար ժամանակ այս նախագծի իրականացման համար խոչընդոտ է հանդիսացել աշխարհաքաղաքական տարբեր պատճառներով։

Դեսպանը նաև ընդգծել է, որ TRIPP-ի մշակման գործընթացում նախատեսվում է համագործակցություն Միացյալ Նահանգների հետ՝ համատեղ ձեռնարկության ձևաչափով։ Նրա խոսքով՝ Հայաստանը մշտական տեղ կունենա բանակցությունների սեղանի շուրջ՝ ապահովելու իր տարածքային ամբողջականության, ինքնիշխանության և իրավասության լիարժեք պահպանումը։ Քվինի գնահատմամբ՝ TRIPP-ը Հայաստանին տալիս է ամուր երաշխիքներ, որ նախկինում առկա մտահոգությունները չեն իրականանա։