Միքայել սրբազանի տեղափոխումը բժշկական կենտրոն հետաձգվել է. մանրամասներ

Երկու տարի ազատազրկման դատապարտված Շիրակի թեմի առաջնորդ Միքայել արքեպիսկոպոս Աջապահյանի առողջական վիճակը վերջին շրջանում վատթարացել էր, պաշտպաններն ահազանգել էին, թե վիրահատական միջամտության կարիք կա։

Նախատեսվում էր, որ Սրբազանն այսօր պետք է քրեակատարողական հիմնարկից տեղափոխվի բժշկական կենտրոն՝ հետազոտությունների, ապա՝ վիրահատման։

Aysor.am-ի հետ զրույցում Միքայել Սրբազանի պաշտպան Մարինե Ֆարմանյանն ասել է, որ տեղափոխումն այսօր չի լինի։

«Վերաքննիչ քրեական դատարանում այսօր դատական նիստ կա, որի ընթացքում քննարկվելու է պաշտպանության կողմի ներկայացրած վերաքննիչ բողոքը՝ դատավճռի դեմ, արդարացման հիմքով։ Քննարկվելու է նաև դատախազության վերաքննիչ բողոքը, նրանք միջնորդել են, որ Սրբազանի դեմ կիրառված պատժի սահմանաչափը բարձրացվի, պատիժը խստացվի»,- ասել է Մարինե Ֆարմանյանը՝ ավելացնելով, որ Սրբազանը բժշկական կենտրոն կտեղափոխվի դեկտեմբերի 16-ին։