ԱՄՆ-ում նոր կայք է թողարկվել․ կհրապարակվի «ամենավտանգավոր» միգրանտների ցուցակը

ԱՄՆ Ներքին անվտանգության նախարարությունը ներկայացրել է «Worst of the Worst» անվանումը կրող նոր ինտերնետային հարթակը, որտեղ տեղադրվում են ներգաղթի և մաքսային ոստիկանության (ICE) կողմից ձերբակալված այն անձանց տվյալները, ովքեր, ըստ գերատեսչության, կատարել են ծանր հանցագործություններ։ Նախարարության գլխավոր էջում հրապարակված հաղորդագրության մեջ նշվում է, որ նախաձեռնությունը ուղղված է առավել վտանգավոր օտարերկրյա հանցագործներին հանրությանը ներկայացնելուն՝ ընդգծելով վարչակազմի քաղաքականությունը նրանց արագ հեռացման վերաբերյալ։

Ըստ նախարարության, հարթակի ստեղծումն իրականացվել է ներքին անվտանգության աշխատակիցների և ICE-ի ստորաբաժանումների համագործակցությամբ՝ ԱՄՆ նախագահ Դոնալդ Թրամփի հանձնարարականների շրջանակում։ Նշվում է, որ առաջնահերթությունը տրվում է այն դեպքերին, երբ ձերբակալվածները մեղադրվում են ծանր քրեական հոդվածներով։

ԱՄՆ Ներքին անվտանգության նախարարի օգնական Տրիշիա Մաքլաֆլին Fox News-ին հայտնել է, որ կայքի նպատակը հասարակությանը տրամադրել հստակ տեղեկատվություն այն հանցագործությունների մասին, որոնց համար ձերբակալվել են անօրինական միգրանտները։ Նրա խոսքով՝ հարթակը պետք է նպաստի գործընթացի թափանցիկությանը և հանրային իրազեկմանը։