Նախկին նախագահներին մեղադրանք առաջադրած Հրաչյա Մուշեղյանը կշարունակի մնալ կալանքի տակ

«Մարտի 1»-ի գործով քննչական խմբի նախկին ղեկավար, ներկայում փաստաբան Հրաչյա Մուշեղյանի կալանավորման որոշումը մնացել է անփոփոխ։ Վերաքննիչ քրեական դատարանը՝ դատավոր Գրիգոր Հովհաննիսյանի նախագահությամբ, մերժել է նրա կալանավորման որոշման դեմ ներկայացված հատուկ վերանայման բողոքը։

«Փաստինֆո»-ն ավելի վաղ տեղեկացրել էր, որ երկրորդ և երրորդ նախագահներին մեղադրանք առաջադրած քննիչ Մուշեղյանը, որը ներկայում զբաղվում է փաստաբանական գործունեությամբ, սեպտեմբերի 12-ին կալանավորվել է Երևանի ընդհանուր իրավասության քրեական դատարանի դատավոր Ջոն Հայրապետյանի որոշմամբ։ Վերջինիս վարույթում քննվում է Հրաչյա Մուշեղյանի մասնակցությամբ գրանցված վթարի գործը։ Նա միաժամանակ մեղադրյալի կարգավիճակ ունի նաև մեկ այլ քրեական վարույթով, որը դեռ նախաքննության փուլում է։

Այդ վարույթը վերաբերում է բիզնես գործունեությանը՝ սկսած 2014 թվականից, ինչը հիմք է դարձել նրան կալանավորելու որոշման համար։ Պաշտպանների պնդմամբ՝ Մուշեղյանը չի ընդունում մեղադրանքը՝ նշելով, որ այն չի կարող վերաբերել իրեն, քանի որ ընկերությունը գնել է 2023 թվականին։

Վերաքննիչ քրեական դատարանը մերժել է բողոքը՝ ուժի մեջ թողնելով առաջին ատյանի դատարանի որոշումը։ Ըստ տեղեկություների՝ պաշտպանները օրերս վճռաբեկ բողոք են ներկայացրել, որի վարույթ ընդունման վերաբերյալ որոշում դեռ չկա։

Գործի զեկուցողը դատավոր Սերժիկ Ավետիսյանն է։