Երբ Ադրբեջանում աճում էր ռազմական բյուջեն, Հայաստանում մեծանում էր երկրի ղեկավարների ընտանեկան բյուջեները. Ռուբեն Ռուբինյան

ՀՀ ԱԺ նախագահի տեղակալ Ռուբեն Ռուբինյանը, խորհրդարանում լրագրողների հետ զրույցում անդրադարձել է Ադրբեջանի ռազմական գերազանցությանը և դրա պատճառներին՝ շեշտելով, որ 2000-ականների ընթացքում Հայաստանը չի մեծացրել իր ռազմական բյուջեն այնքան, որքան անհրաժեշտ էր։ Նա հայտարարել է, որ 1998-2008 թվականներին Հայաստանի իշխանությունները թույլ են տվել ռազմական բալանսի խախտում, ինչն էլ, ըստ նրա, հանգեցրել է 44-օրյա պատերազմին։

«Պետք էր այդ տարիները օգտագործել բանակը ուժեղացնելու համար, ոչ թե Ռոբերտ Քոչարյանի և Սերժ Սարգսյանի ընտանեկան բյուջեները մեծացնելու», - ընդգծել է նա։

Ռուբինյանը նաև արձագանքել է Ռոբերտ Քոչարյանի հայտարարություններին, ըստ որոնց՝ իր կառավարման տարիները եղել են «խաղաղ ժամանակաշրջան»։

«Այո, խաղաղ էին, բայց պարտքով վերցրած խաղաղ տարիներ էին։ Եթե Ադրբեջանում 1998-2008 թթ. աճում էր ռազմական բյուջեն, Հայաստանում աճում էին երկրի ղեկավարների ընտանեկան բյուջեները։ Դա էլ է հանգեցրել պատերազմի սկսվելուն», - հավելել է նա։