Կոլումբիան կպատասխանի ԱՄՆ-ին ու պատմություն կփոխվի մոլորակի համար․ զգուշացում Թրամփին

Կոլումբիայի նախագահ Գուստավո Պետրոն հանրահավաքի ընթացքում հայտարարել է, որ իր երկիրը պատրաստ է պատասխան տալ ԱՄՆ-ին, եթե այն միջամտի Կոլումբիայի գործերին։

«Յագուար նախահայրը կարթնանա, եթե ոսկե արծիվը համարձակվի հարձակվել կոնդորի վրա։ Այդպիսին է լեգենդը։ Ես չգիտեմ՝ դա ճիշտ է, թե ոչ, բայց եթե այդպես է, ապա ես կասեի [ԱՄՆ պետքարտուղար Մարկո] Ռուբիոյին և [նախագահ Դոնալդ] Թրամփին՝ զգույշ եղեք, դուք անցնում եք ազատարարների Կարիբյան ծովը։ Զգույշ եղեք, դուք միջամտում եք Բոլիվարի հայրենիքի գործերին», — ասել է Պետրոն։

Նա ընդգծել է, որ Կոլումբիայի տարածքում նիզակներով գյուղացիների բանակները հաղթել են աշխարհի ամենահզոր բանակներին՝ իսպանական և ֆրանսիական ուժերին։

Կոլումբիան անկախություն է ստացել Իսպանիայից 1819 թվականին։ «Զգույշ եղեք, քանի որ Կարիբյան ծովում ապրում են ժողովուրդներ, որոնք սովոր են փոթորիկներին։ Մի արթնացրեք յագուարին», — ասել է Կոլումբիայի նախագահը։

Պետրոն նաև նշել է, որ հակամարտությունը դեռ հնարավոր է կարգավորել դիվանագիտական ճանապարհով։

«Եկեք խոսենք, բայց հավասարների պես՝ առանց ծնկի իջնելու, քանի որ եթե նրանք համարձակվեն, այստեղ կգտնեն արթնացած, հզոր յագուարին, և պատմությունը կփոխվի ոչ միայն Հարավային Ամերիկայի ազատ երկրներում, այլև ամբողջ մոլորակի համար», — հավելել է նա։

Վերջին շրջանում ԱՄՆ-ի և Կոլումբիայի հարաբերությունները լարված են։ Վաշինգտոնում կարծում են, որ Պետրոյի քաղաքականությունն ու հայտարարությունները վնասում են դաշնակցային հարաբերություններին։ Թրամփը բազմիցս հայտարարել է, որ կոլումբիական նավերը թմրանյութեր են տեղափոխում ԱՄՆ և պետք է ոչնչացվեն։

Հոկտեմբերին Թրամփը Պետրոյին մեղադրել է Կոլումբիայում թմրանյութերի բիզնեսը խրախուսելու մեջ և հայտարարել, որ ԱՄՆ-ը դադարեցնում է ֆինանսական օգնությունը։ Նա նաև հայտնել էր «հսկայական սուզանավի» ոչնչացման մասին, որը, ըստ նրա, բեռնված էր ֆենտանիլով և այլ թմրանյութերով։

Պետրոն պատասխանել է՝ մեղադրելով ԱՄՆ-ին Կոլումբիայի տարածքային ջրերում ինքնիշխանության խախտման և մի ձկնորսի սպանության մեջ, որը կապ չի ունեցել թմրանյութերի առևտրի հետ։

Դրանից հետո ԱՄՆ ֆինանսների նախարարությունը պատժամիջոցներ է սահմանել Պետրոյի, նրա կնոջ, որդու և Կոլումբիայի ՆԳՆ ղեկավարի նկատմամբ՝ դա պատճառաբանելով թմրանյութերի մաքսանենգության դեմ պայքարով։ Պետրոն հայտարարել է, որ շարունակում է պայքարը թմրանյութերի հոսքի դեմ և չի պատրաստվում նահանջել ԱՄՆ պատժամիջոցներից հետո։