Մերցի փոխարեն Գերմանիան կներկայացնի Մակրոնը

Ինչպես հայտնել էինք Գերմանիայի կանցլեր Ֆրիդրիխ Մերցը չի այցելի Երևան՝ մասնակցելու Եվրոպական քաղաքական համակեցության (ԵՔՀ) ութերորդ գագաթնաժողովին: 

Նրա փոխարեն Գերմանիան կներկայացնի Ֆրանսիայի նախագահ Էմանուել Մակրոնը։

Գերմանիայի կառավարության ներկայացուցիչը dpa գործակալությանը հայտնել է, որ Ֆրանսիայի նախագահն օժտված է Գերմանիայի փոխարեն քվեարկելու իրավունքով։ Ըստ պաշտոնական պարզաբանման՝ այս քայլը փոխադարձ համաձայնեցված է և բարձր է գնահատվում երկու կողմերի համար։

Սա կլինի ԵՔՀ առաջին գագաթնաժողովը, որին Գերմանիայի կառավարության ղեկավարը ներկա չի գտնվի։ Որպես բացակայության հիմնավորում նշվել են «այլ պարտավորությունները»։ Մասնավորապես, կանցլերի և ՔԴՄ առաջնորդի օրակարգում Բեռլինում նախատեսված է միայն մեկ հանրային միջոցառում՝ մասնակցություն կուսակցության նախագահության նիստին։

Կառավարության հաղորդագրության մեջ նշվում է, որ դաշնային կանցլերը նախկինում արդեն մասնակցել է ԵՔՀ երկու հանդիպումների և շարունակում է ակտիվ շփումները մասնակիցների հետ։ Նախկինում կայացած յոթ գագաթնաժողովներից հինգին ներկա է եղել Օլաֆ Շոլցը, իսկ Ֆրիդրիխ Մերցը մասնակցել է Ալբանիայում և Դանիայում կայացած հանդիպումներին։

Հատկանշական է, որ Ֆրանսիայի նախագահի և Գերմանիայի կանցլերի կողմից միմյանց փոխադարձաբար ներկայացնելու պրակտիկան նախկինում արդեն կիրառվել է ԵՄ գագաթնաժողովների շրջանակում։