Վրաստանը հրաժարվել է մասնակցել Երևանում կայանալիք Եվրանեսթի նիստին

Վրաստանի խորհրդարանը որոշում է կայացրել չմասնակցել Եվրանեսթի խորհրդարանական վեհաժողովի 12-րդ լիագումար նիստին, որը տեղի կունենա Երևանում հոկտեմբերի 28-30-ը։ Ինչպես հաղորդում է «Սպուտնիկ Վրաստանը», պաշտոնական պատճառաբանությունը կապված է ԵՄ որոշ պատգամավորների վարքի և հայտարարությունների հետ։

Եվրոպական ինտեգրման հարցերով խորհրդարանական հանձնաժողովի նախագահ Լևան Մախաշվիլին բաց նամակով դիմել է Եվրանեսթի ղեկավարությանը՝ նշելով, որ մի շարք եվրոպացի պատգամավորներ Թբիլիսիում հանդես են եկել թշնամական հռետորաբանությամբ և մասնակցել բողոքի ցույցերին։ Նրա խոսքով՝ դա հակասում է փոխադարձ հարգանքի և խորհրդարանական դիվանագիտության սկզբունքներին։

Մախաշվիլին ընդգծել է, որ Եվրախորհրդարանի որոշ անդամների հայտարարությունները Վրաստանում հանգեցրել են հասարակական լարվածության, արմատականացման և բռնության դրսևորումների։ Նա հավելել է, որ Եվրանեսթի ընդունած որոշ բանաձևեր անտեսում են վրացի ժողովրդի ժողովրդավարական ընտրությունը։

«Այս անհատներին հարթակ տրամադրելով՝ Եվրանեսթը խրախուսում է հակաժողովրդավարական վարքագիծը և արդարացնում արմատական քաղաքական օրակարգը», - նշել է Մախաշվիլին իր նամակում։