ՍԱՏՄ-ն ԳՈՒՄ-ի շուկայում հայտնաբերել է 810 կգ ոչ սպանդանոցային ծագման միս՝ այն ոչնչացվել է

Սննդամթերքի անվտանգության տեսչական մարմինը (ՍԱՏՄ) շարունակում է խստացված վերահսկողությունը միս-մսեղիքի վաճառքի կետերում։ Ինչպես հաղորդում են Տեսչական մարմնից, հերթական դիտարկումները կատարվել են Երևանի Խորենացի փողոցում գտնվող ԳՈՒՄ-ի շուկայում, ինչպես նաև մայրաքաղաքի մի շարք այլ առևտրային կետերում։

Աշխատանքներին հետևել է ՍԱՏՄ ղեկավար Տիգրան Պետրոսյանը, ով նշել է, որ ստուգումները լինելու են շարունակական, և ոչ սպանդանոցային ծագման միսը ենթակա է առգրավման և ոչնչացման՝ առանց զիջումների։

Մշտադիտարկման ընթացքում ստուգվել են մսի ծագման փաստաթղթերը (5-րդ ձև), պահման սանիտարահիգիենիկ պայմանները, ինչպես նաև ջերմաստիճանային ռեժիմների պահպանումը։ Արդյունքում հայտնաբերվել է մոտ 810 կգ ոչ սպանդանոցային ծագման միս-մսեղիք, որը անմիջապես առգրավվել և ոչնչացվել է տեսչական մարմնի հսկողությամբ։

ՍԱՏՄ-ն ընդգծում է, որ վերահսկողական աշխատանքները շարունակվելու են ամբողջ հանրապետությունում՝ ապահովելու սննդամթերքի անվտանգության իրավական պահանջների կատարումը և պաշտպանելու սպառողների առողջությունը։