Ադրբեջանը հրաժարվեց մասնակցել Երևանում կայանալիք Եվրոնեստին
Ադրբեջանի Միլի Մեջլիսի պատվիրակությունը որոշել է չմասնակցել Եվրոնեստի խորհրդարանական վեհաժողովի 12-րդ լիագումար նիստին, որը նախատեսված է անցկացվել հոկտեմբերի 28-ից-30-ը Երևանում։
Պատվիրակության ղեկավար Թահիր Միրկիշիլին հայտնել է, որ Եվրոնեստի գործունեության զգալի մասը հիմնված է Եվրոպական խորհրդարանի փաստաթղթերի և հայտարարությունների վրա, որոնք, ըստ նրա, հակասում են Ադրբեջանի ինքնիշխանությանը և տարածքային ամբողջականությանը։
Միրկիշիլին նշել է, որ նման մոտեցումները խոչընդոտում են խաղաղ գործընթացին Ադրբեջանի և Հայաստանի միջև՝ նպաստելով հակամարտության պահպանմանը։ Նրա խոսքով՝ Բաքուն բազմիցս դժգոհություն է հայտնել այդ դիրքորոշումներից, իսկ Վաշինգտոնում կայացած խաղաղ բանակցություններից հետո Եվրոպական խորհրդարանի վերջին հայտարարությունը վերջնականապես նվազեցրել է վստահությունը Եվրոնեստի նկատմամբ։
Միևնույն ժամանակ, Միրկիշիլին ընդգծել է, որ հրաժարումը կապված չէ այն փաստի հետ, որ նիստը տեղի է ունենալու Հայաստանում։ Նա հավելել է, որ երկու երկրների միջև արդեն հաստատվել է խաղաղություն, և իրականացվում են գործնական քայլեր հարաբերությունների կարգավորման ուղղությամբ։
