Վրաստանի նախկին վարչապետ՝ Իրակլի Ղարիբաշվիլուն, մեղադրանք է առաջադրվել
Իրակլի Ղարիբաշվիլին, որը երկու անգամ զբաղեցրել է վարչապետի պաշտոնը «Վրացական երազանք» կուսակցության օրոք և համարվում էր միլիարդատեր ու իշխող կուսակցության հիմնադիր Բիձինա Իվանիշվիլու ամենահավատարիմ և մտերիմ մարդկանցից մեկը, մեղադրվել է առանձնապես խոշոր չափերի ապօրինի եկամուտների օրինականացման համար՝ գրում է BBC-ն։
Վրաստանի գլխավոր դատախազ Գիորգի Գվարակիձեն ճեպազրույցի ժամանակ հայտարարել է, որ Ղարիբաշվիլուն մեղադրանք է առաջադրվել Վրաստանի քրեական օրենսգրքի 194-րդ հոդվածով, որը վերաբերում է փողերի լվացմանը և առանձնապես խոշոր չափերի եկամուտների ձեռքբերմանը։
Ըստ դատախազության՝ 2019-2024 թվականներին Վրաստանի պաշտպանության նախարարի և վարչապետի պաշտոնը զբաղեցրած Ղարիբաշվիլուն Վրաստանի օրենսդրությամբ արգելվում էր զբաղվել ձեռնարկատիրական գործունեությամբ կամ ստանալ վարձատրություն, բացի իր պաշտոնական աշխատավարձից։
Չնայած դրան՝ նա գաղտնի զբաղվել է բիզնեսով և ստացել ապօրինի ծագում ունեցող եկամուտներ՝ առանձնապես խոշոր չափերով, հավելել են իշխանությունները։
Դատախազությունը հայտնել է, որ Ղարիբաշվիլին ամբողջությամբ ընդունել է իր մեղքը։ Դատախազությունը դատարանին միջնորդություն կներկայացնի որպես խափանման միջոց՝ 1 միլիոն լարի (368000 դոլար) գրավ սահմանելու համար, որը կարող է ապահովվել կամ կանխիկ, կամ անշարժ գույքով։
Բացի այդ, դատախազությունը մտադիր է պահանջել Ղարիբաշվիլու անձնագրի հանձնում և նրա՝ երկրից չհեռանալու արգելք:
