Շուտով կլինենք հավաքական, որի հետ շատ-շատերը հաշվի կնստեն․ Հենրի Ավագյան
Հայաստանի ֆուտբոլի ազգային հավաքականի դարպասապահ Հենրի Ավագյանը վստահ է, որ շուտով Հայաստանի հավաքականի հետ հաշվի կնստեն, և հաղթանակները շատ չեն ուշանա: Նա այդ մասին գրել է «Ինստագրամում»։
Ավագյանը դարձել է 2026 թվականի Աշխարհի առաջնության ընտրական փուլի Իռլանդիայի հետ հանդիպման հերոսը. նա փրկեց հավաքականին ավելի խոշոր հաշվով պարտությունից: Հայ դարպասապահի հիանալի խաղին ուշադրություն է դարձրել նաև իռլանդական մամուլը։
«Ես հավատում եմ այն պրոցեսին, ինչի միջով հիմա մենք անցնում ենք։ Սա իմ հավաքականն է, այստեղ մեղավորներ փնտրելու փոխարեն մենք աշխատում ենք սխալները ուղղելու վրա։ Մեր մեծ աշխատանքի և միասնականության շնորհիվ մենք շուտով կլինենք հավաքական, որի հետ շատ–շատերը հաշվի կնստեն։ Այս չափից շատ էմոցիոնալ խաղերից հետո շատ կարևոր է արագ վերականգնվել և շարժվել առաջ։ Շնորհակալ եմ մեր երկրպագուներին անմնացորդ նվիրման և աջակցության համար։ Ամեն ինչ փոխադարձ է, իսկ հաղթանակները երկար չեն սպասեցնի»,- գրել է Ավագյանը։
Հիշեցնենք, որ որակավորման փուլի չորրորդ տուրում Հայաստանի հավաքականը Դուբլինում 0:1 հաշվով պարտվեց Իռլանդիային: Հայկական թիմի դարպասը պաշտպանում էր Երևանի «Փյունիկի» դարպասապահ Հենրի Ավագյանը:
